«ՄԻԱՎ վարակ» առցանց դասընթացի պատրաստման համար հիմք է ծառայել ՄԻԱՎ վարակի հարցերով բուժաշխատողների կատարելագործման նպատակով 2010 թվականից ՀՀ ԱՆ «Ակադեմիկոս Ս.Ավդալբեկյանի անվան առողջապահության ազգային ինստիտուտ» ՓԲԸ-ում (ԱԱԻ) ներդրված «ՄԻԱՎ վարակ» դասընթացը: Դասընթացի անցկացման բազան «ՁԻԱՀ-ի կանխարգելման հանրապետական կենտրոն» ՊՈԱԿ-ն է (ՁԻԱՀ-ի ԿՀԿ):

«ՄԻԱՎ վարակ» դասընթացն ինտեգրված է բուժաշխատողների կատարելագործման կրեդիտային համակարգում: Այն մշակվել է հաշվի առնելով ՄԻԱՎ/ՁԻԱՀ-ի ազգային ծրագրերի շրջանակում տարիներ շարունակ անցկացված սեմինար-վարժանքների, Առողջապահության համաշխարհային կազմակերպության (ԱՀԿ) կողմից աջակցվող «Կրթական կենտրոններում» և այլ ինստիտուտներում ՄԻԱՎ/ՁԻԱՀ-ի թեմաներով դասավանդման առաջավոր փորձը: Դասընթացի ուսումնական նյութերը պատրաստվել են ՁԻԱՀ-ի ԿՀԿ-ի մասնագետների կողմից:

Դասընթացը համալիր կերպով անդրադառնում է ՄԻԱՎ/ՁԻԱՀ-ի ոլորտի հիմնահարցերին, որոնց թվում են ՄԻԱՎ վարակի պատճառագիտությունը, ախտածագումը, համաճարակաբանությունը, կանխարգելումը, ՄԻԱՎ վարակի վերաբերյալ հետազոտությունն ու խորհրդատվությունը, ՄԻԱՎ վարակի ախտորոշման ռազմավարությունները, հիվանդության դասակարգումն ու կլինիկական ընթացքը, օպորտունիստական և համակցված վարակները, հակառետրովիրուսային բուժումը, ՄԻԱՎ վարակին հակազդման ազգային ռազմավարություններն ու հիվանդության նկատմամբ համաճարակաբանական հսկողությունը, ՄԻԱՎ վարակի իրավական ասպեկտները, ներառյալ ՄԻԱՎ/ՁԻԱՀ-ի համատեքստում մարդու իրավունքների, հիվանդությամբ պայմանավորված խարանի և խտրականության հարցերը: Դասընթացի ուսումնական նյութերը մշակվել են ՄԻԱՎ/ՁԻԱՀ-ի կանխարգելման ազգային ծրագրի ռազմավարությունների, «ՄԻԱՎ վարակի վերաբերյալ համաճարակաբանական հսկողության», «Հակառետրովիրուսային դեղերի կիրառմամբ ՄԻԱՎ վարակի բուժման և կանխարգելման», «ՄԻԱՎ վարակի վերաբերյալ հետազոտության և խորհրդատվության, լաբորատոր ախտորոշման» կլինիկական ուղեցույցների հիման վրա: Դրանք պարբերաբար կվերանայվեն ՄԻԱՎ վարակի կանխարգելման և բուժման ոլորտներում նոր գիտական հետազոտությունների, ձեռքբերումների և ռազմավարական մոտեցումների, ԱՀԿ-ի առաջարկությունների հիման վրա:

«ՄԻԱՎ վարակ» առցանց դասընթացի նպատակներն են՝

• Օգնել մասնակցին հասկանալու ՄԻԱՎ/ՁԻԱՀ-ի խնդրի արդիականությունն ու կարևորությունը,
• Ձևավորել հմտություններ ՄԻԱՎ վարակին առնչվող ծառայություններ, այդ թվում՝ ՄԻԱՎ վարակի վերաբերյալ հետազոտություն և խորհրդատվություն տրամադրելու համար,
• Զարգացնել կլինիկական մտածելակերպ ՄԻԱՎ-ի վերաբերյալ հետազոտության կլինիկական ցուցումներ ունեցող պացիենտներին համապատասխան ուղղորդումներ կատարելու համար,
• Նպաստել ՄԻԱՎ վարակի վաղ հայտնաբերմանը, ՄԻԱՎ վարակով պացիենտներին ժամանակին բուժման տրամադրմանը,
• Նվազեցնել բուժաշխատողների կողմից ՄԻԱՎ-ով ապրողների նկատմամբ հնարավոր խարանն ու խտրական վերաբերմունքը:

«ՄԻԱՎ վարակ» առցանց դասընթացը նաև հնարավորություն կտա մասնակցին ստանալու շարունակական մասնագիտական զարգացման կրեդիտներ: